呢一兩年同朋友包括自己講得最多嘅一句應該係: Don't think too much。
大家有無曾經非常渴望同一個人長相廝守，到後來自己又有幾咁慶幸離開咗！當你太focus一樣野嘅時候你就會握緊拳頭向着眉心好緊張好想搵到答案。握得太緊手會痛，睇得太近心會迷，最後只會不斷鑽牛角尖令自己被困死胡同。諗唔通嘅時候就請你放鬆雙手抬起頭遠望，你就會發現其實件事並無你想像中咁複雜；發覺其實你可能唔係想像中咁愛佢；你更可能醒覺原來有更好嘅人係遠處出現。感情雖然無對與錯，不過有時overreact過分認真以致迷失自己就真係"便輸了"。
朋友J喺party認識咗佢所謂嘅"筍盤先生"而且一拍即合傾左成個晚上。"筍盤先生"問朋友J攞咗電話話下星期出去食飯飲嘢，仲話今個weekend會車佢去行山咁話。朋友J等咗三日三夜電話無響過非常失落感覺折磨。我同佢講首先don't think too much，停一停諗一諗就會發現"筍盤先生"可能當時係飲醉9flirt(件事並無想像中咁複雜)，而且仲好似有少少鬥雞眼，講嘢都其實幾大聲(並唔係好似當初咁吸引)。當然最重要嘅係你要接受現實: 如果佢真係有興趣嘅話一早打咗俾你啦！最後結論係: 佢真係打黎先算啦！
所以由今日開始大家要學習放鬆心情唔好諗咁多go with the flow。假如你係嗰啲在乎已讀不回，喺事情十劃都未有一撇就已經有極大expectation嘅人嘅話..請你停止你嘅內心小劇場...送你三個字: 平常心！
假若你仍然諗極都諗唔通，我送你一個最後殺手鐧: 好書推介 He's Just Not That Really Into You。我除咗睇晒呢本書同埋齣戲之外，亦曾經將呢本書放過係床頭..總之一有諗唔通瞓唔着就攞嚟睇，之後心結也就自然解開。唔賣關子自己買本黎睇啦！睇完之後下回大家可以一齊分享下。總之凡事平常心匆心急，唔好同自己過唔去。共勉之！
PS: 如果情人節佢都仲未約會單身嘅你:
1)就算Q數啦-如果要約你一早約咗
2)約咗你代表對你有好感。喇，好感又唔代表係男女朋友㗎- 切記想太多
Search